《帶小朋友去面試,同時亦是爸媽面試學校》

芊嶠下年就讀K1了,這兩個月就少不了去好幾間學校面試。其實嶠媽選學校交申請表時,地點就近是第一選擇,之後就是看排名,一報就報了10間,想想也覺得誇張。第一封收到嘅面試信,已經覺得好緊張,因為而家K1面試係連家長都要一齊面試。

芊嶠第一間面試嘅幼稚園係屋企樓下商場,好就近,我記得係10月中嘅一個星期六,嶠爸都專登請左假來陪芊嶠一齊面試。我記得去到門口,第一感覺係,嘩,點解咁似監獄嘅?門口有道閘,要老師開左道閘,我地先入到去,我地入左去,老師又會關返道閘。之後就登記,比印有芊嶠名嘅Label 叫我地貼係芊嶠身上。再叫我地係中間放好左嘅枱凳到,一路玩玩具,一路等叫名。

等了又等,芊嶠周圍走來走去,都唔知坐左幾多張唔同嘅枱凳,突然,嶠媽醒起要帶芊嶠去廁所。之後芊嶠就去問其中一位老師,廁所在那?老師就話你想去,我帶你去好冇?芊嶠就伸出手,示意拖住老師去。嶠媽本來諗住有老師帶,就坐返係到繼續等,點知嶠爸打眼色示意我跟埋去,於是我就跟住入去。

點知入到去,果然,老師叫芊嶠自己除襪褲,其實平時普通長褲短褲佢都可以自己著自己除。但襪褲就,老師又冇想幫佢嘅行動,我咁啱入到去,我就話老師等我來得啦!老師就笑左一笑出左去。嶠媽個人唔太鐘意個廁所,好殘舊嘅感覺,再加埋老師頭先咁冇愛心,扣左好多分。

出返去坐多陣,就叫芊嶠啦!入到班房,兩位老師,一位面試我和嶠爸,另一位就陪芊嶠係我地左後方張枱到玩玩具。嶠媽我比老師問嘅問題問到口啞啞,我係咁向嶠爸打眼色,好彩嶠爸都答到好多。最令我口啞啞嘅係,問我地有冇報其他學校,我話冇其實佢都唔會信。咁我都如實答有,佢又問,咁如果幾間都收,你點選,點解選我地唔選其他選佢地。又問我地有冇報隔離個間,佢地收芊嶠我地又會唔會讀,真係啞左,好多隻烏鴉係頭頂飛過⋯

最後,好辛苦咁面完試,冇錯,係我同嶠爸面完試!我想講嘅係,每間幼稚園都會係面試前舉辦開放日,比家長帶小朋友去玩,去看看幼稚園嘅環境,但學校開放日個日又未必每個家長都有時間去參觀。咁就唯有帶小朋友去面試個日,家長同時去面試間學校。學校面試學生係想選適合嘅學生,家長都一樣,面試學校都係想選一間環境好,舒適,適合小朋友嘅學校。

嶠媽嶠爸選學校唔係一定要好大,但就要入到去感覺舒服,小朋友去到唔會係咁喊住話要走,或者係平時小朋友好鐘意笑,但去到又唔笑等等嘅表現。另外,仲有觀察下老師對小朋友嘅態度,從而睇下佢地有冇愛心等等。總結,芊嶠去左8間幼稚園面試,有幾間嘅感覺係,就算佢地收芊嶠,我地都未必考慮。你可能會話唔考慮點解一早要報,我想分享嘅係我真係要去到幼稚園,入去親身見過、觀察過、感受過,先發現到佢地嘅好與壞,知道適唔適合自己小朋友。希望各位家長係帶小朋友面試嘅同時,自己都要面試下間幼稚園,睇下係咪合你和小朋友心水啦!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Blog at WordPress.com.

Up ↑

%d bloggers like this: