水晶纜車初體驗 x 聖誕戶外飄雪 @ 昂坪360

聖誕又一好去處,嶠爸一連放四日假,日日都有 plan 去玩,今日都唔例外,一早諗定要去昂坪360,搭纜車,去大佛食齋!其實一年前我地都來過,個陣係同朋友來,靜雞雞話你知,細佬個陣已經係嶠媽個肚架啦!細佬出世後,真係一家四口去,都係第一次,所以想特別啲,決定豪一次,坐水晶纜車🚡。擺嶠爸上枱 (因為嶠爸畏高架🙈)。

我地一早上網睇左,原來昂坪市集,會有戶外飄雪活動,哩個都係我地想去嘅其中一個原因,平日嘅飄雪活動會係 12:45 及 14:30,每節20分鐘。為免兩位小朋友要訓晏教,我地就決定一早出發。食左早餐,就搭機場巴士,係纜車站附近落車。

大約11點45就去到纜車站,上網買定飛,都唔洗排好耐隊,水晶纜車比較少人坐,所以都唔洗排好耐隊就可以上到纜車,亦都唔洗10人一架車咁慘,影相唔洗見到好多其他人。

上左車,準備好出發啦!因為有少少雨,一邊嘅窗好多水珠💦

感謝同車嘅朋友幫我地一家影左張咁靚嘅全家福,雖然細佬覺得地面嘅風景更吸引🤦🏻‍♀️

兩姐弟係到一路傾計,一路欣賞風景!其實姐姐心諗:細佬我好驚,點解你咁大膽🤣

坐到一半,連畏高嘅嶠爸都加入,齊齊坐埋一齊欣賞風景,不過睇佢姿勢都知佢仍然有啲驚😄

哩位人兄做咩係車上做一字碼🤔

車程大約20分鐘,落左車,又點少得係哩個靚靚景到影返張靚相,唔該同車朋友順便又幫我地一家四口影返張靚相,仲要影左好多張,張張都有纜車🚡做背景架👍🏼

之後來到昂坪市集,有架好靚嘅纜車,由雪鹿拉住,好靚,芊嶠勁快咁跑左上去,明明人地影緊相🤦🏻‍♀️叫返佢落黎,等人地影完,我地都影左張先啦!影完去個廁所先,因為未夠鐘睇飄雪。

嘩嘩嘩!搭正 12:45,就會有飄雪由幾部機一齊飄出來,一飄落黎我地就即刻跑上纜車,做左第一家上纜車影飄雪景嘅家庭✌🏼一路影相,芊嶠一路話我個頭好多雪,係咁要幫我抹走左先肯影相。媽媽心諗:抹走左又睇到落緊雪呢?🤦🏻‍♀️

影完靚相,就當然唔少得玩其他野!就係哩個「360動感影院」,因為買車票,順便可以以優惠價買埋3項娛樂設施玩,其中一項係「360動感影院」。但動感影院,小朋要必須要 100cm 以上及 3 歲以上,兩樣都附合嘅先可以參加架!講返先,哩個動感影院,係 5D,迪士尼都只係玩過 4D 咋!我地選左「小飛蟻大冒險」睇,好緊張刺激,5D 果然係唔同呀下!有啲位連嶠媽都嚇親🤦🏻‍♀️🤦🏻‍♀️但真係好值得一睇,相信小朋友都會睇得好開心!

另外一個娛樂設施就係「360舞臺 – 昂坪大戲院」,哩個一家大細都啱玩,冇限身高/歲數!但嶠媽提醒大家,睇嘅途中都會有啲好大聲嘅位,所以帶bb嘅媽媽就要好好考慮,怕唔怕會嚇到bb!身經百戰嘅細佬,好彩都冇嚇親😯仲有,如果你想有機會上台玩,入場後可以坐前排,就有機會架啦!

第3個娛樂活動係「與佛同行」,係一個好好嘅體驗來架!可以了解釋迦牟尼得大智慧頓悟成佛嘅一生歷程。

之後亦可以拎一塊葉子🍃,許願並放入大佛下的箱子。 話得昂坪市集,咁梗係有野賣架啦!都真係好多遊客睇,有睇有買,平日都好熱鬧下喎! 行前啲啲,有好多牛牛🐮呀!芊嶠見到話好驚,要拖實爸爸先敢埋去合照一張,但行到九丈遠🤦🏻‍♀️不過哩隻牛算係最乾淨,一路行,前面個啲都好污糟,仲痛一隻係到痾緊💩💩🤮🤮

之後就行左去食齋,食完齋就係大佛底影返張相留念,我地決定,下次等細佬識行先再上大佛,因為無論係爸爸定媽媽揹,揹果個都會好慘😔

=========================

昂坪360

Website:https://www.np360.com.hk/tc/ Facebook:https://www.facebook.com/np360/

飄雪聖誕

日期:2017年12月1日至2018年1月1日

地點:昂坪市集內之市集廣場,菩提廣場

飄雪時段:星期一至五:每日下午12:45及2:30;星期六﹑日及公眾假期:每日下午12:45、2:30及4:00 (每節約20分鐘)

小童2折限時優惠

2017年12月1日至2018年1月1日,凡以正價購買成人來回纜車車票(標準車廂),本地小童即可享優惠價港幣20元乘坐昂坪纜車標準車廂(來回)一次。

#聖誕戶外飄雪 #昂坪360#水晶纜車 #昂坪市集 #360動感影院 #360舞臺 #昂坪大戲院 #與佛同行 #芊嶠與劻霖成長日記

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Blog at WordPress.com.

Up ↑

%d bloggers like this: